Aidon Willemse (19), ’n kranige gholfspeler van Worcester, wil nog groot sukses op die gholfbaan bereik maar het al reeds sy merk in hierdie sport begin maak.
Standard het by die jong man gaan inloer om te hoor wat sy passie aanvuur.
Willemse het vir die eerste keer in 2012 waarlik sukses in die sport behaal toe hy opgeneem is in die o.13 Boland-gholfspan. Hy het sy laerskool onderrig by Hexpark Primêr ontvang en noem dat hierdie skool die deure vir hom oopgemaak het om ’n beurs te kry by Hoërskool De Villiers Graaff in Villiersdorp.
Willemse was gekies vir die Boland-premier se internasionale provinsiale toernooi (IPT) in 2019 en speel al reeds van o.13 af by hierdie spog toernooi. Van sy ander prestasies sluit in:
- Wjinlander junior kampioen in 2012
- Wellington junior meester toernooi wenner in 2014
- o.19 Bolandspan IPT wenners in 2016 en 2018
- Theewaterskloof gholfklub kampioen in 2019
“Ons is baie trots op hom vir wat hy tot dusver bereik het in gholf. Aidon het in moeilike omstandighede groot geword maar hy het nooit toegelaat dat dit hom definieer nie en ons is dankbaar vir ’n kleinseun soos hy,” sê sy ouma, Doreen Abrahams.
