Die Universiteit Stellenbosch se jaarlikse ope dag beloof om weer eens die geskikte geleentheid vir graad 12-leerders te wees om inligting oor studiegeleenthede, finansiële hulp, huisvesting en die Matie-studentelewe te bekom.
Die 2021 se ope dag, wat vanjaar vir die eerste keer aanlyn aangebied word, vind Saterdag 17 April van 09:00 tot 14:00 plaas.
“Die webtuiste bestaan uit virtuele stalletjies waar leerders en ouers inligtingsessies kan bywoon, brosjures en dokumente aflaai en met ’n adviseur gesels,” vertel Michelle Swart, US se woordvoerder.
Die dag bied belangrike inligting oor hoe om aansoek te doen, finansieringsopsies, loopbaan-advies en studente-steun (soos studente met spesiale leerbehoeftes).
“Die webtuiste met al die uitstallings en inligtingsessies sal steeds beskikbaar wees tot 31 Julie,” voeg Swart by. . Leerders word vriendelik versoek om vooraf by www.sun.ac.za te registreer.. Skakel met Michelle Swart by 021 808 4709 of by michelleswart@sun.ac.za vir meer inligting.
