Kaleidoskoop (Instituut vir Blindes) is al vir 135 jaar ’n instelling in Worcester. Hulle is bekend vir hul houtwerkprodukte, 100%-katoenweefmatte, rottangprodukte, metaalwerk, dekoratiewe staalprodukte, matrasse se binnevering en spons, verpakkingsdienste aan ondernemings en hul eie Kaleidoskoop Blindiana Blend-koffie.
Breedevalleiers wat sulke items wil aanskaf – van uitstekende gehalte en boonop gemaak deur siggestremde inwoners vir wie ’n inkomste só geskep word – kan Ons Winkel in Kerkstraat Maandae van 08:30 tot 17:00 besoek, Dinsdae tot Vrydae van 08:00 tot 17:00 en Saterdae van 08:00 tot 13:00.
Deur die winkel te besoek vir ’n verskeidenheid mooi én funksionele items, ondersteun klante Kaleidoskoop se visie om ’n beter toekoms te skep vir persone wat siggestremd is en om persone wat blind, swaksiende, doofblind of siggestremd is met onderwys, opleiding en versorging tot ’n vervulde lewe en volle burgerskap te bemagtig.
Besoek gerus Kaleidoskoop se webtuiste by www.blind-institute.org.za of volg hulle op Twitter@Institute4Blind.
