“Ek is baie trots op myself, maar eerder meer verlig dat alles oor en verby is.” So het Nicola Jansen van Vuuren laggend gesê oor haar uitmuntende matriekuitslae.
Nicola was verlede jaar Worcester Gimnasium se topleerder en het sewe A’s met ’n gemiddelde van 93,4% in haar matriek-eindeksamen verwerf.
Sy sê haar familie en vriende was haar grootste ondersteuning, want hulle het haar gereeld aangemoedig en gesê hulle weet sy sal goed doen in die eindeksamen.
Oor haar sukses vertel sy: “Ek het reeds in September, ná die rekordeksamen, met hersiening begin en gefokus op my probleem-areas. En ek het toe al begin voorberei vir die eindeksamen deur gesond te eet en genoeg oefening te doen sodat ek nie tydens die eksamen siek sou word nie – en natuurlik deur te leer.”
Sy sê sy het haarself deurgaans self gemotiveer om haar beste te doen sodat sy niemand teleur sou stel nie.
“Ek moet bieg ek was redelik positief dat my uitslae goed sou wees, maar ná my wiskunde- en natuur- en skeikundevraestelle het ek half gehoop ek doen goed, want dit was moeiliker as wat ek gedink het. Maar dit was toe op die ou end nie so sleg nie,” vertel sy.
Haar ouers en familie is baie trots op haar. “Ons het geweet sy gaan goed doen, want sy het deur haar hele hoërskoolloopbaan akademies uitgeblink. En ons dank God dat hy haar geseën het met die vermoë om akademies goed te wees,” sê haar ma, Laetitia Jansen van Vuuren, trots.
Laetitia meen die skool se toegewyde en hardwerkende onderwysers het ook daartoe bygedra dat Nicola en die ander leerders so goed presteer het.
Nicola gaan haar studies aan die Universiteit Stellenbosch voortsit, waar sy BSc menslike lewenswetenskappe en sielkunde gaan studeer.
