’n Spesiale inisiatief om matrieks te motiveer is by die Hoërskool Breërivier op Worcester gehou.
Die projek is geïnisieer en gedryf deur een van die streek se bekendste digters, Frans Wiesie, self ’n oudleerder van die skool.
Wiesie sê suksesvolle oudmatrieks van die skool is genader om elk ’n praatjie te kom lewer oor die geleenthede wat daar wel daar buite is.
Die idee daaragter was om huidige matrieks aan te spoor en om die skool se matriekslaagsyfer nog verder te verbeter.
Dit het ook aan die oudleerders die geleentheid gebied om weer terug te ploeg in die gemeenskap van waar hulle kom, sê Wiesie. Daar word beoog om dit ’n jaarlikse instelling te maak.
