Valleiers verduidelik wat ‘erfenis’ vir hulle beteken

Erfenisdag wat jaarliks op 24 September gehou word, erken en vier die kulturele rykdom van ons nasie en ons mense.

Suid-Afrikaners vier die dag deur die kulturele erfenis van die talle kulture waaruit die bevolking van Suid-Afrika bestaan, ??te onthou. Verskeie geleenthede word reg oor die land en selfs in die vallei aangebied om hierdie dag te herdenk.

Erfenis is die grondslag van alle gemeenskappe en ’n noodsaaklike bron van identiteit en kontinuïteit.

Aspekte van erfenis sluit in kulturele tradisie, mondelinge geskiedenis, opvoerings, rituele, geskiedkundige dae, vaardighede en tegnieke, inheemse kennisstelsel en ’n holistiese benadering tot die natuur, samelewing en sosiale verhoudings.

In Suid-Afrika word die term “ontasbare kulturele erfenis” in samewerking met die term “lewende erfenis” gebruik.

Lewende erfenis speel ’n belangrike rol in die bevordering van kulturele diversiteit, sosiale kohesie, versoening, vrede en ekonomiese ontwikkeling.

“Erfenis beteken na my mening geskiedenis. Dit kyk terug na waar ons vandaan kom, dit vier hoe ver ons gekom het en dit kyk na hoe ons vorentoe gaan. Erfenis is ook dit wat ons elkeen uniek maak, maar tog by mekaar uitbring,” sê Sandri Steyn van Worcester.

“Erfenis beteken kultuur. Dit is die musiek wat ons luister, die rugby wat ons saam oor naweke gaan kyk, die gevoelens wat ons deel. Erfenis is wat my verbind aan my mense en my ook leiding gee om te wees wie ek wil wees,” meen Nicolan Markus van Worcester.

“Erfenisdag is vir my ’n dag om trots te wees op my kultuur. Ek is in Ierland gebore en het as jong kind na Suid-Afrika verhuis – ’n plek wat voel of dit almal welkom heet as jy hierheen kom. Ons het soveel verskille wat ons elk uniek maak. Dit moet beslis gevier word,” het Oison Doyle van Rawsonville gesê.

“Ek voel persoonlik Erfenisdag moet elke dag gevier word. Ons is geneig om ander se foute altyd uit te wys en foute toe te skryf aan kulture of mense, maar dit is omdat ons mekaar nie verstaan nie. As iets vir ons anders is, maak ons of dit vreemd is. Ons moet mekaar beter probeer verstaan en ons erfenis is die kern daarvan,” het Geverne Cupido van Worcester gesê.

In elke gemeenskap is daar lewende, menslike skatte wat oor ’n hoë mate van kennis, vaardighede en geskiedenis beskik wat betrekking het op verskillende aspekte van ons diverse lewende erfenis. Dit is dus belangrik vir Suid-Afrikaners om hierdie verskeie aspekte van lewende erfenis te herwin en te bewaar om die gebruik van lewende erfenis te versnel om uitdagings waardeur gemeenskappe vandag in die gesig gestaar word, aan te spreek.

Braaidag word ook op hierdie dag gevier. ’n Aktiwiteit eie aan Suid-Afrika en een waaraan bykans elke persoon in die land al deelgeneem het.

Standard het by Valleiers gaan kers opsteek oor wat erfenis vir hulle beteken.